– Noo den Mam, whit’s fir tae da night?
– I made smoked fish an’ brö wi’ tatties an’ peas yun soond guid?
– Oh yea, dat’ll be juist splendit!
– Fine dat, will Morgan aet it tinks du?
– Yea, I’m sure shö wid. Dir no’ muckle at shö doesna aet.
– Shö seems lik a fine anoff lass onywye.
– Du liks her, den?
– Oh yis, shö seems möst lovely.
– Dat’s…dat’s guid tae hear, I’m blyde. Erm…Mam?
– Yis?
– Aboot Morgan…
– Mmm-hmm?
– Weel, me an’ her, wir…brawly closs.
– I kin see yun, yis.
– Whit I mean, Mam, is…shö’s…weel…shö’s no’ a pal. Sorry, I mean shö’s no’ juist a pal.
– Oh?
– Shö’s…weel, shö’s me girlfreend.
– I see…an’ how lang’s dis been gjaan on fir?
– Erm…aboot twartree mont?
– Whit wye’s it ta’en de dis lang tae say so?
– Weel I…erm…
– Du didna tink I wid be tirn wi’ de, surely?
– Kinda…an’ I thocht it wis better tae tell de faess tae faess.
– My lass, I couldna care less wha du loves. Du’s me dowtir. As lang as Morgan is guid wi’ de, I’m blyde fir da pair o’ you.
– Thanks Mam. I juist hae tae tell Dad an’ Granny noo.
– Hit’ll be fine my lass, I promise. Noo, wid du lik tae go an’ let de girlfreend keen at da tae’s ready?
– Whit time is Dad hame da night?
– No’ till late, but dinna du worry aboot him eanoo. You pair kin spik da moarn.
– Mam?
– Dinna fret, lass. I love de, an’ dis cheenges nithin’. I wid hoop he’d feel da sam as me, but I’ll ay be dere fir de.